الموسيقي الشعبي والشارع المصري

أذا كانت الموسيقي تعبر عن حضارة البلد ،، كما هو شائع ومعروف عند غالبية الناس

فأن الموسيقي الشعبي أكبر واقع علي الشارع المصري .

فالموسيقي الشعبي حاليا صعب فهمها ،،وأنا شخصيا مش قادر أفهمها ،،لا هي تسعدني ولا هي تطربني وأنما فقط مجموعة من الأصوات الكثيرة وتكون المحصلة (( دوشة )) وصداع .

ممكن يجي في بالك علي طوول أني راجل عجوزوبتجاعيد كتيره ومش مستحمل الأصوات العالية لكن ،،، لأ بالعكس أنا بحب اسمع ترانس (( والترانس ليها ذبذبات عالية ا ))ولسه 23 سنة

الفكرة في الدوشة ذي ما قولت في أول المقال أنها بتعبر عن الشارع المصري ،عن اتوبيس النقل العام ، والزحام ،

،وواحد يطلع بيقؤلك 4 بلالين بجنية ،، رشا تلعب وحماده يلعب ،،وبابا يدفع الجنيه ،، وواحد تاني يطلع يقؤلك الكتاب ده يا اخوانا في المكاتب ب7 جنيه مش هاقول 6 ولا هقول 5 جنيه هما 2.5 ونص يا أخووووانا ،،وأخر مجموعه معايا .

دوشة وقلق من كل أتجاه ،، الكمسري يقابلك بوش كشري ،،وجمبك واحده ابنها عمال يعيط عايز ربع جنيه من أمه ،، وزوج وزوجه راكبين مش طايقين بعض . 3 شباب في سن ال 17لابسين هدوم بألوان زاهية وفاقعة يركبوا الأتوبيس يهرجوا بصوت عالي ويضحكوا ضحكات أصلها الألم ويشغل الموبايل الصيني ، ،وصباح الدوشة والصداع
روح بأه لمصلحة حكومية ،، هتلاقي برضوه في زحمة ،،والموظفات كلهم تخان ،،وثقال الحركة وباردين .طبعا من الأكل ،،مفهوم العيد عندهم أكل وتلفزيون ،،و ممارسة الرياضة بالنسبة ليهم بقت حاجه هزلية .

لو بصيت للناس اللي في وسط البلد بيبيعوا هدوم ،،ونظارات ،، وشرابات ،،وملابس داخليه . أول ما يسمعوا أن الشرطة جاية ،،هووووبا في أقل من 30 ثانية يكون شال الخشبة بتاعت البضاعة ،،وأختفي من علي وجه الأرض .



طب ماهو واحد عايش بالشكل ده ياتري هيسمع موسيقي شكلها عامل أزاي ؟؟؟؟
. هيسمع موزارت ولابيتهوفن .
_________________________



لازم صح تكون دوشة وخربطة ، عشان هي دي اللي هيعرف يتجاوب معاها .

صحيح الناس دي عندها حق والله ، .... لكن وبعدين ؟؟
_ _ _ _ _


بتهيألي لازم نكون عطوفين علي بعض شوية لأن الناس مفرومة.

لأن مش باقي غير الرحمة والحب .